BR LA UNION – Inyanunsiyo ti state weather bureau nga opisyalen a nagleppas iti La Niña ket senyal met daytoyen iti panagsubli ti neutral climate conditions.
Maibasar iti kabarwan a climate monitoring ti bureau, iti sea surface temperatures iti central ken equatorial Pacific ket nagsublin iti El Niño-Southern Oscillation wenno ENSO-neutral conditions a kaipapanan nga awanen ti La Niña wenno El Niño iti agdama.
Segun iti state weather bureau a ti panagleppas ti La Niña, adda pagbaliwan ti panawen, kas iti panagbaba ti above-normal rainfall iti sumagmamano a paset ti Luzon, Bicol, Eastern Visayas ken northeastern Mindanao.
Naiyakar ti ENSO Alert and Warning System iti “inactive” wenno awanen ti namnamaen a mabukel a La Niña wenno El Niño iti sumaruno a tallo a bulan.
Namnamaen iti panagraira ti neutral conditions agingga Setyembre, Oktubre ken Nobiyembre ti agdama a tawen.
Kasaruno iti panagleppas ti La Niña, agtultuloy iti ballaag ti state weather bureau iti publiko seknan iti warm and dry season tapno maliklikan iti heat stress ken dadduma pay a peligro iti salun-at a gapwanan ti nabara a panawen.
