BR LA UNION – Nakailista iti Department of Health (DOH) ti 383 a kaso ti aksidente iti kalsada manipud Abril 13 agingga 19 ita a tawen, a mas nababbaba nu ikumpara iti 32% iti kapada a panawen idi 2024 kabayatan ti obserbasyon ti Semana Santa.
Iti pakabuklan a bilang, 296 a kaso ket adda pakainaiganna iti motorsiklo ken 324 indibidwal ti saan a nagusar ti safety gear kas ti helmet ken seatbelt.
Maibasar pay iti report, 31 a tattao ti adda iti impluwensya ti arak bayat nga agman-maneho.
Uppat a tattao ti natay, amin ket adda pakainaiganna iti motorcycle accident.
Gaputi dayta, naminsan pay a nagpalagip ti DOH iti publiko a saan nga agmaneho a nabannog wenno nabartek, agsuot ti helmet wenno seatbelt, sumurot iti speed limit ken road signs, ken liklikan ti agusar ti cellphone bayat nga agman-maneho.
Innayon pay ti DOH, a siguradwen nga adda naan-anay a turog, manipud pito agingga walo nga oras sakbay nga agbiyahe tapno agtalinaed nga alerto, agbalin a kalmado, nainayad ken mangipakita ti pannaka-awat iti pada a motorista tapno malisyan iti road rage.
