BR LA UNION – Natiliwen dagiti otoridad iti maikatlo a suspek iti kaso a pammapatay iti maysa a menor de edad idi Enero uno idiay Barangay Alaska, Aringay, La Union.
Idi Abril 18, 2025, ballaygi nga inarestar dagiti kameng ti Aringay Municipal Police Station iti suspek a maibilang kas Top 3 Provincial Level Most Wanted Person ditoy La Union.
Ti nasao nga akusado ket naarestar idiay Brgy. San Eugenio, Aringay, babaen iti bileg ti Warrant of Arrest nga inyisyu ti Regional Trial Court, Branch 31, idiay Agoo, La Union, gaputi kaso a Homicide.
Binigbig ti Aringay Municipal Police Station iti akusado kas 21-anyos, residente met laeng ti Brgy. Alaska, Aringay.
Maipalagip nga adda pakainaiganna ti kaso iti maipagarop a panangpatay dagiti suspek iti maysa a menor de edad idiay Barangay Alaska, Aringay idi baro a tawen, Enero 1, 2025.
Maibasar iti report ti Aringay Police Station, tallo dagiti maipagarop a suspek a nang-atakar iti biktima bayat ti panag-iinom dagitoy idi baro a tawen.
Idi natumba ti biktima, maysa kadagiti suspek ti maipagarop nga armado ti kutsilyo ket binagsol na iti biktima ti namin-adu a daras.
Nagsagaba iti biktima ti lima a bagsol iti bagi, tallo iti kannigid ken dua iti kannawan a paset ti bagi na, a puon ti dagus a nakatayan daytoy.
Dagiti dua a menor de edad a suspek ket immuna a simmuko kadagiti otoridad idi April 14, 2025, kalpasan a nangiyisyu ti korte ti warrant of arrest .
Kinuna ni PCol. Redentor C Ulsano, Acting Provincial Director ti LUPPO, iti pannaka-arestar ti suspek ket mangipakita iti natibker a commitment tapno nan-anay a maipaay ti hustisiya para iti biktima ken iti pamilya na.
Inallokoy pay ti opisyal iti publiko nga i-report nu adda iti ammo wenno nakita a krimen ket impaganetget na ti kinapateg ti community cooperation tapno tulongan dagiti otoridad nga agbalin a mas epekibo iti panangipatungpal ti pagrebbengan dagitoy.
