Dumanonen ti P10-M ti patong ti ulo ti makaitudo ti sadinuman nga ayan ti co-mastermind ti panagpatay ti negosyante a ni Anson Que ken ti driver na a ni Armanie Pabillo.
Binigbig ni PNP spokesperson Police Brigadier General Jean Fajardo ti nasao a co-mastermind ti nagan a Wenli Gong, maysa a Chinese national nga addaan pay kadagiti sabali a nagan kas Kelly Tan Lim, Bao Wenli, Axin, ken Huang Yanling.
Segun kenni Fajardo, panggep daitoy a patong ti ulo iti madagdagos a pannakaarestar iti co-mastermind. Maipalagip as sakbayna ket inwaragawag ti PNP ti P5-M reward money ken nadakamat payen dagiti lima a suspects ti nakaam-ames a krimen.
Tallo kadagitoy ket adda iti kustodiya ti kapulisan – isuda David Tan Liao, Richardo Austria, ken Reymart Catequista bayat nga agtultuloy met a birbiruken dagiti otoridad da Jonin Lin ken ni alias Kelly.
Da Kelly ken Lin ket agpada a mastermind ti pammapatay kenni Que ken Pabillo bayat nga agpapada met a kasabwat dagiti tallo.
