BR LA UNION – Binuweltaan ti Palasyo ti Malacañang ni Vice President Sara Duterte gaputi panangiwaras ti fake news.
Daytoy ket kalpasan nga imbaga na a maipagarop a karaman ni First Lady Liza Araneta-Marcos iti maysa nga insidente idiay Amerika nga adda natay gapu iti ilegal a droga.
Imbaga ni VP Sara a daytoy ti maipagarop a makagapo nu apay a naarestar ni sigud a President Rodrigo Duterte tapno kalluban iti maipagarop a pakairam-ramanan nga isy ti First Lady.
Segun kenni Palace Press Officer Claire Castro, a maibasar iti inaramid a waragawag ti Bise Presidente, agpar-parang nga isuna mismo iti mangiwar-waras ti fake news ken iti panangiramanna iti First Lady iti maysa nga insidente nga awan ti basaran.
Impaganetget ni Castro, awan kinapudno na iti waragawag ti Bise Presidente.
Inlawlawag ni Castro, nga idi March 10 ket adda pay laeng ditoy Pilipinas iti First Lady, ken March 11 a dimmar-ay iti maysa nga opisyal nga aktibidad kadwa na dagiti mangibagbagi ti Girl Scouts of the Philippines.
Isunga imposible kunana a maikonektar iti First Lady iti insidente idiay Amerika.
Innayon pay ti Malacañang, a kaawan daytoy ti respeto iti Girl Scouts of the Philippines, agsipudta par-parwaren ni VP Sara a saan a pudno iti nasao nga aktibidad.
Gaputi dayta, kinuwestyon ni USec. Castro nu rumbeng kadi pay a pattien dagiti ibagbaga ti Bise Presidente, a maipagarop a pagtataudan ti fake news ken disinformation.
