BR LA UNION – Kinomendaran ti Provincial Government of La Union (PGLU) iti Provincial Treasurer’s Office (PTO) ken Commission on Elections (COMELEC) La Union Provincial Office iti ballaygi a distribusyon dagiti official ballots, accountable forms, ken dadduma pay nga election paraphernalia iti amin nga ili ditoy probinsiya idi Domingo, May 4, 2025, kas preparasyon iti umadanin a National and Local Elections inton May 12.
Indaulwan da Provincial Treasurer Janet Molina ken COMELEC La Union Election Assistant Marku Dominik Lavaro iti ceremonial unsealing ken pannakalukat ti delivery truck a nakaikargaan iti election paraphernalia idiay Provincial Capitol Grounds, City of San Fernando, La Union.
Maipalagip a pakabuklan nga 840 official ballot boxes ken 20 boxes ti indelible inks iti naawat ti PGLU ken COMELEC.
Dagus met a naisayangkat iti nainget nga inspection kadagiti balota ken dagus a naiturn-over iti maysa a siyudad ken 19 nga ili.
Maibasar iti listaan, iti City of San Fernando ti immuna a naka-awat kadagiti election materials nga adda pakabuklan a 110 ballot boxes; Bacnotan – 52 ballot boxes; Bangar – 35 ballot boxes; Bauang – 75 ballot boxes; San Juan – 48 ballot boxes; Santo Tomas – 42 ballot boxes; Luna – 45 ballot boxes; Aringay- 45 ballot boxes; Burgos – 13 ballot boxes; Santol – 15 ballot boxes; Sudipen – 23 ballot boxes; Tubao – 33 ballot boxes; Caba – 29 ballot boxes; Pugo – 22 ballot boxes; Bagulin – 15 ballot boxes; Agoo – 67 ballot boxes; Balaoan – 42 ballot boxes; Naguilian – 51 ballot boxes; Rosario – 56 ballot boxes; ken San Gabriel – 22 ballot boxes.
Iti panagbetla ni Provincial Treasurer Molina, siniguro na iti patas, responsable, ken transparent electoral system.
Segun met kenni Lavaro, dagiti naisangpet balota ket nakadulin itan iti municipal treasury offices sakbay a maiturong kadagiti int clustered polling precincts, nasapa inton Lunes May 12.
Siniguro pay ni Lavaro iti publiko a kumpleto dagiti naidistribute a ballot boxes ken nainget ti maipat-patungpal a seguridad kadagiti nakadulin a makina ken election materials.
