BR LA UNION – Natay iti maysa a 65-anyos a botante kalpasan ti panagbotos na idiay Albay, segun iti Philippine National Police (PNP).
Binigbig ti Police Regional Office 5 (PRO-5) iti natay a ni Nestor Rensales, a napukawan ti puot agarop alas-6:05 ti agsapa kalpasan a nagbotos idiay Oas South Central School, idiay Barangay Ilaor Sur.
Segun kenni Police Lt. Col. Maria Luisa Calubaquib, tagapagsarita ti PRO-5, ni Rensales ket naatake iti puso ken dagus a naipaayan ti first aid babaen kadagiti medical personnel ti Commission on Elections (Comelec) iti lugar.
Dagus a naiturong iti provincial hospital idiay Ligao City, ngem naideklara a dead on arrival.
Maipalagip nga immunan nga inyanunsiyo ti Comelec iti nasapsapa a panag-botos dagiti senior citizen, PWDs, ken masikog.
Nupay kasta, sumagmamano latta a botante ti nagreklamo ti nakaro a pudot kadagiti presinto a nagbotosan dagitoy.
