BR LA UNION – Addan iti person of interest ti Luna Police Station ngem awan pay ti nalawag a na-establisar a motibo iti napasamak a pammapatay iti maysa a real estate broker idi huwebes, Mayo 29, idiay Barangay Darigayos, Luna, La Union.
Iti pannakiuman ti Bombo Radyo La Union kenni PMajor Lawrence Ganuelas, agdama a Public Information Officer iti La Union Police Provincial Office (LUPPO), kinuna na a trabaho ti maysa nga ad-adalen da nga anggulo iti napasamak a krimen.
Maipalagip a natay kalpasan a napaltugan ti real estate broker ken land developer a ni Benigno Lorica, 73-anyos, addaan asawa, residente ti Barangay Maria Cristina, Bangar, La Union.
Dagiti suspek ket dua a lallaki, nakalugan ti motorsiklo. Iti driver ket nakasuot ti black jacket ken helmet bayat a ti backrider wenno gunman ket nakasuot ti gray t-shirt.
Napasamak ti pammaltog bayat a nakaparada iti lugan ti biktima iti ruar ti maysa a restaurant iti nasao a lugar.
Nagsagaba ti biktima iti dua a tama ti kalibre 45 a paltog iti kannigid ken kannawan nga abagana.
Dagiti met suspek ket dagus a naglibas a nagturong iti amianan a direksyon.
Iti biktima ket immuna a naiturong idiay Luna Rural Health Unit ngem naiyakar idiay Balaoan District Hospital para iti naan-anay a pannakataming.
Nupay kasta, natay bayat a matam-taming.
Iti agdama, nainget ti panang-review dagiti otoridad iti CCTV footage a naala iti lugar a nakapasamakan ti krimen para iti pakabigbigan dagiti suspek.
