BR LA UNION – Inbutaktak ita ti International Atomic Energy Agency (IAEA) a tinamaan iti US airsrtike ti sumrekan iti tunnels ti Isfahan nuclear complex idiay Iran.
Segun iti grupo, nakaru a nagpasar ti pannakadadael iti sumrekan iti underground tunnels ti nuclear sites.
Innayon ti grupo a sakbay pay iti panag-atake ti Israel iti nuclear facilities ti Iran idi Hunyo 13 ket inlemmengen ti Iran iti uranium da iti underground ti Isfahan.
Kabayatanna, impadamag met ti health ministry ti Iran nga awan ti nailista da a radioactive contamination manipud iti nuclear facility nga inatake ti US.
Maipalagip nga impannakkel ni United States of America President Donald Trump a maysa a “successful” iti naaramid a bombing attack iti tallo a nuclear sites idiay Iran.
Nagusar ti Estados Unidos iti 30 a Tomahawk missiles ken bunker-buster bombs tapno dadaelen dagiti nasao a nuclear facilities ket inawagan met daytoy ni Trump nga “obliterated” wenno napunas da dagiti nasao a delikado a pasilidad.
Kasaruno daytoy, imballaag na iti nakarkaru pay a panagbomba nga isayangkat da idiay Iran nu saan nga ag-surrender dagitoy.
Maibasar iti datos, umaboten ti nasurok 430 ti natay idiay Iran bayat a 24 met iti biang ti Israel sipud timpuar ti giyera da idi Hunyo 13.
Imbaga ti Pentagon idi kalman, Domingo, a mabayag sakbay a naan-anay a ma-assess iti epekto ti naaramid a panagraut idiay Iran, nangruna ket nagpasar ti “extremely severe damage” dagiti mapapati a nuclear sites.
Iti agdama, pagdandanagan a bumales ti Iran. Imbaga ni Iranian Foreign Minister Abbas Araqchi nga aramiden da amin a wagas tapno depensaan ti soberanya da kalpasan ti panagbomba ti Estados Unidos kadagiti tallo a nuclear facilities.
Impaganetget ti Iran a saan da nga agpakigla iti Estados Unidos ken kinondenar da pay iti ilegal nga opensiba dagitoy.
Kabayatanna, nangipeksa ti panagdanag dagiti sumagmamano a pagilian iti kumarkaro a tensyon idiay Middle East ken nagpanawagan ti United Nations iti ceasefire iti kabiitan a panawen tapno lapdan iti nalawlawa pay a pagtungpalan ti tensyon.
