BR LA UNION – Pinapigsa pay ti Israeli military ti ar-aramiden da a panagbomba idiay Gaza.
Daytoy ket kalpasan a nangiruar ti baro nga evacuation order iti Israeli military ita nga aldaw ti Lunes.
Bayat nga agsag-sagana met dagiti opisyal ti Israel para iti panagsasarita idiay White House seknan iti posible a ceasefire.
Naamwan a dagiti baro nga airstrikes ken operasyon idiay amianan ti Gaza ket nanggubway ti nakaru a perdisyon iti komunidad, kasaruno iti mass evacuation orders.
Segun kadagiti residente, agtultuloy ti ar-aramiden a panagbomba ti Israeli military iti pagadalan, pagtaengan, ken dadduma pay a lugar dagiti sibilyan iti rehiyon.
Naipadamag pay a nakastreken dagiti tangke ti Israel iti dumaya a paset ti Zeitoun suburb ken naaddaan ti serye a panagbomba sadiay.
Maibasar iti report ti Reuters, uppat a pagadalan iti binomba ti Israeli military ken umabot ti 38 a tattao ti natay iti airstrike ti Israel ita nga aldaw ti Lunes, kabilang dagiti 10 idiay Zeitoun ken 13 idiay Gaza City.
