Agbiahe idiay Estados Unidos ni Presidente Ferdinand Marcos Junior inton Dominggo tapno itandudo iti saritaan mainaig iti pagsyaatan ti Pilipinas ken interes dagiti Pilipino.
Segun kenni Foreign Affairs Assistant Secretary Raquel Solano, kangrunaan dagiti agenda ti presidente iti panagtaripnong da kenni US President Donald Trump ket ti panangdakamat ti 20% reciprocal tariff nga impaulog na ditoy pagilian.
Innayon na nga adda dagiti ummun-unan nga opisyales ti Pilipinas ti nagturong idiay Washington DC a makadwa ti presidente iti nasao a negosasyon.
Mangnamanama met ti gobierno a ti panagbisita ni Presidente Marcos ket makabukel isuna ti maysa a bilateral trade agreement wenno katulagan iti reciprocal trade, nga agpada nga agbenepisyar ti dua a pagilian. Mainayon iti dayta ket ti panangpasiguro iti suporta manipud iti Estados Unidos para ti upgrades dagiti arawaten ti Armed Forces of the Philippines (AFP) ken Philippine Coast Guard (PCG).
Para iti tay-ak ti depensa ken seguridad, kinunana a saan a maliklikan ti posible a panangdakamat dagiti dua a lider ti development wenno dagiti pamaspasamak idiay West Philippine Sea (WPS).
Ti opisyal a panagbisita ni Presidente Marcos idiay Estados Unidos ket mangrugi iti Huly 20 agingga 22, 2025, kas sungbat iti imbitasyon ni US President Donald Trump.
