BR LA UNION – Impaganetget ti Korte Suprema a saan pay nga absuwelto ni Vice President Sara Duterte kadagiti kaso a sangsangwen na.
Daytoy ket kalpasan nga indeklara ti Korte Suprema nga ‘unconstitutional’ dagiti articles of impeachment nga indatag ti House of Representatives kontra kenkuana.
Segun kenni Supreme Court Spokesperson Atty. Camille Sue Mae Ting, ti nasao a deklarasyon ket saanna kayat a sawen a naabsuelto ti bise presidente kadagiti akusasyon kenkuana.
Iti laksid daytoy, inbinglayna a mabalin pay laeng ti mangipila ti baro nga impeachment complaint kontra iti akusado nga opisyal ngem daytoy ket inton sumaruno a tawen 2026.
Ti deklarasyon nga inruar ti Korte Suprema ket kalpasan a nakita da a nalabsing iti ‘1 year rule’ ken napaay a pannakabigbig ti karbengan para iti maiparbeng a proseso kas nailanad iti Bill of Rights ti konstitusyon.
Kinuna pay iti tagapagsarita ti Korte Suprema a ti desisyon nga insurat ni Senior Associate Justice Marvic Leonen ket nakailanad iti pagrebbengan ti Korte Suprema a maipatungpal nu anyaman ti maiyannurot iti linteg.
Kinuna na a nupay mausa a ‘political process’ iti panangisayangkat ti ‘impeachment proceeding’, saan latta a maibilang a ‘political proceeding’ laeng.
Maipalagip nga iti insyangkat a sesyon ti Supreme En Banc idi Biyernes, nagkaykaysa dagiti mahistrado iti panagbotos da a pabor iti nasao a deklarasyon.
Iti articles of impeachment nga impasa ti kamara idiay senado ket winaswas ti Korte Suprema kas ‘unconstitutional’ ken ‘null and void’.
