Nakasublin kadagiti pagtaengan da dagiti minilyon nga evacuees kalpasan a maibabawi dagiti ballaag ti tsunami iti intero a Pacific, maysa nga aldaw kalpasan a timama iti magnitude 8.8 a gingined iti kabaybayan ti Kamchatka peninsula idiay Russia.
Nangitonda daytoy ti temporario a mass evacuation manipud pagilian a Japan agingana idiay Hawaii, Chile, ken Ecuador.
Napatta-patta a dumanon iti uppat a metro iti posible a kangato ti dalluyon.
Idiay Japan, naiyakar dagiti nasurok dua a million nga indibidwal pakairamanan dagiti empleyado ti Fukushima nuclear plant.
Maysa met a babae iti nasao a pagilian iti naipadamag a natay kalpasan a natnag iti linuganan na a behikulo iti rangkis bayat nga agbakbakwit.
Idiay Chile, nasurok a 1.4 million dagiti naiyakar nga ibilbilang ti gobierno kas kadakkelan nga evacuation iti pakasaritaan ti pagilian. Awan met iti naipadamag a perdisyon gapo ti Tsunami.
Apagapaman met a ngimato iti danom idiay Galapos Islands ken nabiit met laeng a nagsubli iti normal iti sitwasyon.
Kabayatanna, iti paset ti Severo-Kurilsk, Russia, naireport iti nakaro a perdisyon kangrunaan iti maysa a puerto ken nalayos dagiti pabrika ti nasao a lugar.
Naipadamag met iti panagbettak ti Klyuchevskoy volcano kalpasan iti gingined.
Segun iti US Geological Survey, karaman iti gingined kadagiti 10 a kapipigsaan iti intero a lubong manipud idi tawen 1900, ken addaan ti 59% a posibilidad ti aftershock a napigpigsa ngem iti magnitude 7.###
