BR LA UNION – Ballaygi iti naiyuswat nga OPLAN:KABALAKA (TULONG TI KABSAT) relief operations ditoy probinsiya ti La Union.
Ti nasao a proyekto ket maysa a serbisyo publiko a pinartuat ti Bombo Radyo Philippines ken Bombo Radyo Philippines Foundation Inc. a tumul-tulong kadagiti umili a kangrunaan nga agkasapolan iti tengnga ti krisis gaputi pannaka-biktima da iti kalamidad, kas iti bagyo emong a dimmuprak ditoy probinsiya idi bulan ti Hulyo.
Pakabuklan a 1,000 dagiti recipient, kaadwan ket mangngalap ditoy siyudad ti San Fernando ken idiay ili ti San Juan, nga immawat ti relief pack a well-milled rice ken bioderm soap, iti naisayangkat a programa idi kalman, Agosto 14, 2025.
Nagbalin a ballaygi iti aktibidad babaen ti tulong dagiti kameng ken volunteers ti Diocese of San Fernando, Our Lady of Perpetual Help Parish, Saint John The Baptist Parish, Philippine Coast Guard, ken Philippine National Police.
Adda pakabuklan a 100 a sako ti well-milled rice ken kinarton a sabon manipud International Pharmaceuticals Inc. iti naibunong para iti nasao a proyekto ditoy probinsiya ti La Union.
