BR LA UNION – Awan ti napagtulagan a ceasefire idiay Ukraine iti uneg ti tallo nga oras a panagtaripnong da President Donald Trump ti Estados Unidos ken President Vladimir Putin ti Russia idiay Joint Base Elmendorf-Richardson idiay Alaska.
Nupay agpada nga inawagan da nga “extremely productive” ti summit, imbaga ni Trump iti media: “There’s no deal until there’s a deal.”
Nagballaag ketdi daytoy a mangipataw ti nadagsen nga economic sanction nu agtultuloy a pagkedkedan ni Putin iti kinakapya.
Saan nga imbitado iti nasao a panagtaripnong ni Ukrainian President Volodymyr Zelenskyy, banag a nagdanagan dagiti kaalyado idiay Europa.
Bayat a maisay-sayangkat iti summit, naipadamag ti baro a drone strikes ti Russia idiay Ukraine a nakatayan ti pito a sibilyan ken nakasugatan dagiti 17.
Iti agdama, agtaltalinaed nga awan ti katulagan, agtultuloy ti tensyon iti rehiyon ken maur-uray ti sumaruno nga addang dagiti lider.
Nagtitipon met dagiti pro-Ukraine demonstrators iti ruar ti base, ken naka-imet da iti plakard nga “Alaska Stands With Ukraine”.
Nangisayangkat met ti emergency virtual summit dagiti lider ti EU sakbay ti nasao a taripnong tapno ipaganetget a saan a rumbeng a matagi-awan iti Ukraine iti negosasyon.
