Nagballaag ni Senate Blue Ribbon Committee Chairman Senador Rodante Marcoleta iti kontratista a ni Allan Quirante (iti makinkukua ti QM Builders), kalpasan a mangipaay daytoy ti nagduduma a testimonya iti kangitingitan ti imbestigasyon maipanggep ti P545 billion a flood control projects ti gobierno.
Iti naisayangkat a panagdingeg ti komite, nadamag ni Quirante maipanggep iti legal a takder ti kompaniana.
Immuna nga insungbat na ket maysa a sole proprietorship iti QM Builders ken saan a rehistrado kas maysa a korporasyon, banag a nakasdaawan dagiti senador kangrunaan ta karaman iti construction firm kadagiti nakaala ti dakkel a kontrata manipud kadagiti rehiyon.
Agis-isem laeng ti negosyante kadagiti saan na a masungbatan a damag ti manmanday-linteg, a nangigapo metten ti panakasuron ti committee chairman.
Idi agangay ket tinulungan isuna ni Senador Ronald dela Rosa a maibinsa-binsa a nasayaat dagiti dakdakamaten na.
Malaksid kenni Quirante, dinillaw pay ti komite iti Department of Public Works and Highways iti panangawat ti proprietorship kas kontratista kadagiti proyekto nga agkasapulan ti nalawlawa a kapasidad ken accountability.###