BR LA UNION – Naidatag idiay House of Representatives iti singasing linteg nga addaan tarigagay a maipaayan ti mandatory a 14th month pay dagiti empleyado iti pibado a sektor.
Iti sidong ti House Bill 3808 nga indatag ni Trade Union Congress of the Philippines (TUCP) party-list Rep. Raymond Mendoza, iti 13th month pay ket rumbeng a maipaay iti Hunyo 24 bayat a ti 14th Month pay ket agingga Disyembre 24 kada tawen.
Ti nasao a bayad ket depende iti pagsaritaan dagiti empleyado ken employers wenno adda bigbigen da a collective bargaining agreement.
Ti 14th month ket kaibatugan iti maysa a bulan a suweldo nga aw-awaten ti maysa nga empleyado iti pagpapaayan a kompanya.
Kinuna ni Mendoza a mabalin met nga agpa-exempt dagiti kompanya a marigatan ngem nasken nga otorisado daytoy ti Department of Labor and Employment (DOLE).
Immunan a nangidatag ni Senate Minority Leader Vicente “Tito” Sotto III ti kapada a gakat a linteg idiay Senado.
