Ibilang ni Senador Ping Lacson a “notorious” wenno kalatakan iti probinsya ti Bulacan para kadagiti naanomalyaan a flood control projects.
Iti privilege speech ti Senador, imbutaktak na iti panagkunniber dagiti dua a naikkat nga distict engineers ti Bulacan First Engineering Office nga isuda sigud a District Engineer Henry Alcantara ken iti simmukat kaniyana a ni former Assistant District Engineer Brice Hernandez. Bayat iti panangidaulo dagiti dua, maipagarop a dua pulo ket walo a proyekto para ti tawen 2024 dagiti agpapada ti gatad na uray pay nagduduma met iti kadakkel ti maaramid a proyekto.
Naipadamag pay a maysa kanyada ket maab-abak ti ginasut a milyon iti maysa a casino idiay Manila.
Binabalaw met ni Lacson iti mapagduduaan a flood control projects idiay Candating, Arayat, Pampanga, kalpasan a madadael manen iti riverbank mitigation structure uray pay mano a darasen a natarimaan ken ginastusan ti gobyerno.
Maibasar iti report, idi laeng bulan ti Hulyo ket dagos a nagreggaay iti paset ti istraktura kalpasan ti panagduprak ni Bagyong Emong iti laksid ti panakatarimaan na idi Hunyo agdama a tawen.
Idi 2018, nailatang iti P20 million a pondo para iti “konstraksion wenno rehabilitasion ti slope protection iti kawatiwatan ti Pampanga River, Candating Section, Arayat, Pampanga”. Ngem idi agangay ket nadadael.
Manipud iti sigud a P20 million ket dimmanon iti nasurok P274.8 million iti pakabuklan a gatad dagiti nagastos para iti kapada a flood control structure wenno nasurok 815% a nangatngato maiyarig iti immuna a konstraksion.
Mainaig iti daytoy, nadakamat iti Eddmari Construction and Trading a kanayon a maal-ala kas contractor para iti proyekto nga immunan a mairamraman kadagiti nadumaduma a kontrobersiya, pakairamanan iti panakadelist daytoy kas DHSUD builder idi 2023.
Kabayatanna, imbutaktak pay ti Senador a 40% laeng ti pondo iti maar-aramat para kadagiti flood control projects no sadino 8-10% kadagiti district engineers, 2-3% nga agserbi kas kickback ti district engineering office manipud ti sumobra a kita ti contractor, 5-6% kadagiti miyembro ti Bids and Awards, 0.5-1% iti Commission on Audit, ken 20-25% para iti funder wenno politiko a nangbirok ti pondo para iti proyekto.###
