BR LA UNION – Saanen a nagpalikaw pay ni Pasig City Mayor Vico Sotto ket inawagan na a habitual liars ti agassawa a Discaya, ti akinkukua dagiti construction firm a mairam-raman iti anomalya dagiti flood control projects.
Istorya ni Mayor Sotto, nga am-ammo na dagiti Discaya iti lokal a politika ken construction circles sipud idi nagtugaw a mayor.
Imbaga na nga adu ti istorya a nagwaras seknan iti transaksyon dagitoy, ngem linimitaran na ti testimonya na kadagiti banag a personal a na-obserbaranna.
Kinuna na a dagiti imbestigasyon ken report iti kallabes ket pakakitaan nu kasatnu kauneg ti ramot ti construction empire dagiti Discaya.
Innayon na a dandani amin a kompanya ket adda nakapenpen a deficiency iti buwis, sumagmamano iti Bureau of Internal Revenue (BIR) ken sigurado nga uray iti lokal a gobyerno.
Inlawlawag ni Sotto a makipas-paset latta iti local bidding dagiti kumpanya ti Discaya idi nag-mayor, agsipudta nainget a maipatpatungpal idiay Pasig iti open ken public bidding.
Nupay babassit dagiti kontrata a naala da idiay Pasig, nadlaw na a dagiti kontrata manipud Department of Public Works and Highways (DPWH) ket addaan ti dadakkel a kantidad.
Direkta na pay a kinuwestyon iti kredibilidad ti agassawa, nangruna idi tinagibassit da iti sworn statement dagitoy iti mapas-pastrekan da.
Binabalaw ni Sotto iti waragawag ti pamilya nga adda dagiti gundaway a maipagarop a malugi da.
Tapno paneknekan ti punto na, sinaggaysa ni Sotto ti numero a mangipaneknek nga imposible ti waragawag dagiti Discaya.
Segun kenni Sotto, mismo a ti waragawag da iti publiko ket mangipakpakita ti kontradiksyon iti depensa da.
Nagballlaag pay ti mayor a nupay pudno nga adda kinakusit iti naduma-duma a suli ti gobyerno, ilis-lisi laeng dagiti Discaya ti isyu babaen ti panangdakamat iti adu a nagan nga awan ti ebidensya.
