Opisyal nga inruar ti Department of Justice iti listaan dagiti indibidual a mairekrekomenda a kasuan ti National Bureau of Investigation, kasaruno a makakala iti ahensia ti natibker a nasapataan a salaysay manipud kadagiti testigo nga imasideg ken nangibutaktak ti imporasion maipanggep iti maanomalya a flood control projects.
Immuna iti listaan ni Ako Bicol Party-list Representative Zaldy Co, dagiti senador nga isuda Chiz Escudero, Joel Villanueva, Jinggoy Estrada, sigud a Senador Bong Revilla, ken ni sigud nga Undersecretary Mitch Cajayon-Uy, Maynard Ngu, Beng Ramos, sigud a Department of Public Works and Highways Undersecretary Roberto Bernardo, Engineer Henry Alcantara, ken dadduma pay.
Iti pakabuklan, dumanon iti 21 nga indibidual dagiti adda iti listaan a nairekomenda a kasuan ti NBI.
Segun ti DOJ, iti nasao a rekomendasyon ket manipud iti testimonya dagiti sigud nga opisyal ti Department of Publik Works and Highways nga isuda Engineer Henry Alcantara, Engineer Brice Hernandez, Engineer Jaypee Mendoza, ken Undersecretary Roberto Bernardo.
Kabayatanna, pinasingkedan met ni Justice Secretary Remulla nga isagsagana dan iti kiddaw ti International Criminal Police Organization tapno maisyuhan ti Blue Notice ni Ako Bicol Partylist Representative Zaldy Co.
Impasigurado ti sekretaryo nga uray awan pay ti ‘blue notice’ ket iprosproseso dan daytoy kagiddan ti panakairaman ni Co iti maanomalya a flood control projects.
“Yes we’re working on it. Yes, I’m asking Assistant Secretary Eli Cruz to help us with the blue notice”
Inaklon ni Remulla a saan daytoy a nalaka gapo iti kinaado ti impormasyon a naipasango iti departamento idi napalabas.
“Ano yan, we’re still digesting all of it kasi nga massive yung information na dumating the past two days. And it’s not that easy to digest everything”
Panggep met daytoy a mabantayan ken maamuan iti lokasyon ti manmanday-linteg a mairamraman iti kontrobesiya.###
