CEBU CITY – Rinibo a residente idiay probinsiya ti Cebu iti nagkaribuso ken nagtataray nga arigna saan da nga ammo ti aramiden ken pagturongan da kalpasan a dayyegen ti napigsa a gingined a 6.9 magnitude agarop alas-9:59 idi rabii, Martes, Setyembre 30, 2025.
Kabilang dagiti nagpasar ti nakaru a pannakadadael ket iti 139-years old nga Archdiocesan Shrine of Santa Rosa de Lima idiay Daanbantayan, Cebu, kalpasan a narsuod ti sumagmamano a paset ti simbaan, ken dua pay a heritage church idiay Bantayan Island ken Tabuelan.
Idiay Bogo City, Cebu a sentro ti gingined, nagpasar met ti nakaru a perdisyon iti maysa a nalatak a fast food chain ket naideklara a saan a natalged ti sumrek.
Nakapadas met dagiti motorista iti panagberri iti kangrunaan a kalsada.
Idiay Cebu City Medical Center, temporaryo a naiyakar dagiti pasyente ken medical staff iti ruar ti ospital kas panagannad.
Kabayatanna, sumagmamano a pagadalan idiay Cebu City, Mandaue, ken kabangibang pay a lugar iti nagdeklara ti suspensyon ti klase ita nga aldaw ti Miyerkoles, Oktubre 1.
Iti eksklusibo nga interview ti Bombo Radyo Cebu News Team kenni Joel Erestain, Regional Director ti Office of the Civil Defense – Region 7, kinuna na nga iti amianan a paset ti Cebu iti kangrunaan nga apektado ti gingined.
Iti agdama, makomikom dagiti otoridad ken dadduma pay a maseknan a grupo a mangisay-sayangkat ti search and rescue kadagiti posible a n naipit iti gingined ken clearing operation kadagiti kangrunaan a kalsada.
Agarop alas-2:00 itay parbangon Oktubre 1, kinumpirma ti lokal a gobyerno idiay Bogo City a siyam a nataengan ken uppat nga ubbing ti natay.
Uppat met nga indibidwal ti naipadamag a natay idiay San Remegio, segun iti Cebu Capitol PIO.
Maibasar iti latest tally manipud Capitol of Cebu, umaboten ti aganay 22 dagiti natay ngem agtultuloy a maipas-pasidong dagitoy iti balidasyon ken kumpirmasyon.
