BR LA UNION – Naipasidongen iti State of Calamity ti probinsiya ti Cebu kalpasan ti napigsa a 6.9 magnitude a gingined idi rabii (Setyembre 30) a nakatayan ti aganay 60 a tattao kas maibasar iti datus ti Office of the Civil Defense, ken nangigubway ti nakaru a perdisyon kadagiti sanikua ken imprastuktura, kangrunaan na iti sentro ti gingined idiay Bogo City .
Ti deklarasyon ket maiyannurot iti impaulog ni Governor Pamela Baricuatro nga Executive Order No. 57, kagiddan ti resolusyon nga impasa ti Provincial Board itay agsapa, Oktubre 1.
Daytoy ket tapno napaspas a maipalospos iti calamity fund a mausar para iti napar-partak a response operations.
Makita pay kadagiti ladawan nga imbinglay ti gobyerno probinsiyal ti Cebu dagiti inisyal a kasapolan dagiti tattao a biktima ti gingined, sitwasyon dagiti pasyente iti ruar ti Provincial Hospital idiay Bogo City.
Nagbalin nga emosyunal ni Governor Baricuatro, iti panagbisita na idiay Cebu Provincial Hospital ken agtultuloy kunana dagiti marikrikna nga aftershocks iti siyudad ken kabangibang a lugar.
Agarop alas 9:00 itay agsapa, inruar ti Capitol ti listaan dagiti 43 local government units (LGUs) a nagsuspinde ti klase iti amin a tukad kas paset ti precautionary measures bayat a maisay-sayangkatiti safety inspections dagiti pagadalan ken imprastruktura ti gboyerno.
Kabilang ditoy dagiti major cities a Mandaue, Carcar, Danao, Naga, Talisay, Toledo, ken Bogo, agraman
iti sumagmamano nga ili a kas ti Medellin ken dadduma pay a lugar idiay northern ken southern Cebu.
Agtultuloy iti ar-aramiden nga assessment dagiti maseknan tapno amwen ti kalawa ti perdisyon kadagiti apektado a lugar kabayatan ti rescue ken relief operations.
