BR LA UNION – Dumanon iti P245 million ti net worth wenno pakabuklan a kinabaknang ni Senate President Pro Tempore Ping Lacson ita a tawen 2025.
Maibasar iti inruar na a net worth, umabot iti P244,940,509.60 ti pakabuklan a baknang ni Lacson idi June 30, 2025 idi nagsubli idiay Senado — adayu iti P58,771,409.62 idi June 30, 2022 idi pimmanaw idiay Senado kas senador.
Segun iti senador, ti panagngato ti kinabaknang na ket gapu iti lehitimo ken dimmur-as a negosyo na iti real estate ken trading a sinerrek na kadwa ti dua a business partners idi temporaryo a nagretiro iti politika idi 2022.
Maibasar iti Income Tax Return (ITR) ti senador, nagbayad ti pakabuklan a P4,817,265 para iti taxable year 2021 ken P11,834,033.37 para iti taxable year 2024 — indikasyon a dakkel ti ngimmatuan ti birok na iti napalabas a tallo a tawen.
Siniguro ni Lacson a mangipaay ti kanayunan a detalye seknan iti 2025 SALN, kabilang dagiti ITR para iti 2023 ken 2024, iti kanito a makumpleto dagiti dokumento.
