BR LA UNION – Harassment ken fake news iti sungbat ni Senator Joel Villanueva iti inwaragawag ni Ombudsman Jesus Crispin Remulla ita nga aldaw ti Huwebes, October 23, 2025, a kiddawen na kenni Senate President Vicente Sotto III nga ipatungpal ti 2016 dismissal order kontra kenni Senator Joel Villanueva.
Dagus a nangibinglay ti senador iti dokumento ken kopya ti sertipikasyon manipud Office of the Ombudsman ken Sandiganbayan a mangipakpakita a na-dismiss iti kaso na idi 2019.
Mangipaneknek kunana nga awan ti nakapenpen a kaso na a kriminal wenno administratibo ken saan nga akusado wenno maidar-daum iti anyaman a kaso iti paguukuman.
Dagiti dua a dokumento ket agpada a naiyisyu idi Setyembre 10, 2025.
Maipalagip nga idi 2016, immandar ni sigud nga Ombudsman Conchita Carpio Morales ti panangpatakyas kenni Villanueva manipud serbisyo publiko gaputi maipagarop nga anomalya iti panangusar ti P10 milyon a pondo manipud iti pork barrel allocation na idi kongresista pay laeng ti posisyon na.
