Nadundunor dagiti dua a lallaki kalpasan a natnag iti nagluganan da a motorsiklo iti kanal nga adda iti kawatiwatan ti Naguilian-Bagulin Road idiay Barangay Bimmotobot, Naguilian, La Union, idi kalman, Oktubre 30, 2025.
Maibasar iti report ti Naguilian Municipal Police Station (MPS), napasamak iti insidente agarop 12:30 AM ken involved iti motorsiklo a Rusi 150, agmaris ti nangisit, ken awanan ti plaka. Minaneho daytoy ti indibidual nga agtawen ti 30, ken ti sakay na ket agtawen ti 36, agpada nga awanan trabaho ken asawa, ken residente ti Barangay Cardiz, Bagulin, La Union.
Ti inisial nga imbestigasyon ti pulisya, naammuan nga iti motorsiklo ket agdaldalyasat iti abagatan a direksion idi kellaat a napukawan ti kontrol iti manibela ti driver iti maysa nga uphill curve. Gapu iti dayta, limmabso da iti igid ti kalsada ket natnag iti nauneg a kanal.
Agpada a nasugatan ti driver ken ti pasahero na dagus a naiturong iti Naguilian District Hospital para iti dagus a pannakataming.
Nadadael met iti motorsiklo ken saan pay a masinunuo iti gatad ti magastos para ti panakatarimaan na.
Naammuan pay dagiti otoridad nga agpada nga awan ti suot da nga helmet idi napasamak ti aksidente.
Segun ti pulisya, “human error” wenno reckless driving iti rason ti insidente.
Ipalpagip ti Naguilian MPS iti publiko, nangruna dagiti motorista, a kanayon nga agtulnog kadagiti linteg ti trapiko, agusar ti umno a protective gear, ken siguraduen a nasayaat iti kasasaad dagiti lugan tapno maliklikan dagiti kapada nga aksidente.
