BR LA UNION – Umabot iti pakabuklan a 21,098 a pasahero iti nailista ti Philippine Coast Guard (PCG) iti amin a pantalan ti intero a pagilian manipud alas-12 itay tengnga ti rabii agingga alas-6 itay agsapa Nobyembre 2, 2025, kas paset ti panagbantay iti sidong ti “Oplan Biyaheng Ayos: Undas 2025.”
Iti nasao a bilang, 10,772 iti outbound passengers bayat a 10,326 dagiti inbound passengers.
Kas panagsagana iti tinawen a panagdopodop dagiti biyahero tunggal Undas, nasurok a 5,200 frontline personnel manipud iti 16 PCG Districts iti nabilin nga agbantay iti pantalan.
Nangisayangkat da ti inspeksyon iti 157 a barko ken 26 a motorbanca tapno masiguro ti kinatalged ken kina-annayas ti biyahe dagiti pasahero.
Sipud pay idi Oktubre 30 agingga Nobyembre 4, impangato ti PCG iti alert status iti amin a districts, stations, ken sub-stations kas sungbat iti manamnama a panagadu ti bilang dagti biyahero a Pilipino nga agawid kadagiti probinsya tapno lagipen ti Piyesta ti Natay .
Iti “Oplan Biyaheng Ayos” ket maysa a tinawen nga inisyatibo ti Department of Transportation (DOTr) kadwa da dagiti ahensya a kas ti PCG, LTO, LTFRB, ken PNP tapno masiguro a natalged, naurnos, klen napaspas ti biyahe ti publiko tunggal peak travel seasons kas ti Undas, Paskua, ken Baro a Tawen.
Malaksid iti inspeksyon dagiti lugan pangbaybay, agtultuloy nga ipat-patungpal ti PCG iti strict security protocols, kabilang iti panangimuntar ti K9 units, baggage inspection, ken panag bantay iti pasilidad ti pantalan tapno maliklikan iti anyaman nga insidente.
Nabalakadan dagiti biyahero a maki-koordinar kadagiti otoridad para kadagiti abiso iti kasasaad ti panawen ken kondisyon ti biyahe, ken siguradwen a sumursurot iti intuding nga allagaden iti kinatalged ti amin.
