BR LA UNION – Naisalbar iti biag ti maysa a lalaki a beachgoer manipud iti gestay pannakalmes na iti kabaybayan a sakop ti Barangay Urbiztondo, San Juan, La Union.
Napasamak ti insidente Sabado, Nobyembre uno, 2025.
Maibasar iti report ti Coast Guard Station – San Juan, nasiputan ti PCG Baywatch Team a buklen dagiti kameng ti Philippine Coastguard, Municipal Disaster Risk Reduction and Management Office (MDRRMO) San Juan ken local surfers, iti senyas nga agpatpatulong ti nasao a lalaki nga adda iti baybay.
Dagus a nangipatungpal iti bunggoy ti rescue operation ket ballaygi a naisalbar da manipud iti posible a pannakalmes ti saan metten a nainaganan a lalaki.
Maibasar iti salaysay ti lalaki, ginuyod isuna ti napigsa a puwersa ti dalluyon bayat ti panaglangoy, ket narigatan nga agsubli iti igid ti baybay.
Naipaayan ti lalaki iti medical attention ket nakumpirma a natalged ti kondisyon na a nagsubli iti pamilya na.
Nagpalagip manen ti Philippine Coast Guard iti publiko nga agannad a kanayon ken agbalin nga alerto ti amin a gundaway kabayatan ti panaglangoy wenno panagdigos iti kabyabayan nangruna kadagiti paset a napigsa ti dalluyon ken puwersa ti danum.
