Indeklara ti La Union Police Provincial Office (LUPPO) a naballigi ken natalna iti pakabuklan a selebrasion ti Undas 2025 iti intero a probinsia.
Segun kenni PMaj. Lawrence Ganuelas, awan ti nairekord nga untoward incident a napasamak nupay adda dagiti nakumpiskar a natatadem a banag manipud kadagiti bumisbisita – a naisubli metlaeng iti panagruar da iti sementeryo.
Naipababa met dagiti otoridad dagiti nariri nga agpatpatugtog iti uneg ti Kampo Santo a maysa kadagiti maiparit nga aramiden.
Daytoy nga addang ket tapno mapagtalinaed iti kinaurnos, kinakappia, ken disiplina iti lugar.
Naipatungpal daytoy babaen ti nasapa a deployment ken traffic plan dagiti police stations iti sidong ti superbision ni Police Colonel Redentor C. Ulsano, Provincial Director ti La Union Police Provincial Office.
Adda met ti augmentation manipud Regional Office ken personal met a simmarungkar ken nag-inspeksion ni Police Brigadier General Dindo R. Reyes kadagiti sementeryo.
Babaen ti panagtitinnulong dagiti umili ken ti dedikasion dagiti kameng ti pulisya, nagleppas ti Undas 2025 ditoy La Union nga awan ti aniaman a dadakkel nga insidente — maysa a pammaneknek iti kinasagana ken pakaseknan ti La Union Police Provincial Office iti panangtaginayon ti kinakappia ken seguridad ti publiko.###
