BR LA UNION – Maysa a kayyanak a maladaga iti naabandonar ken nasarakan iti igid ti kalsada idi Nobyembre 5, 2025 idiay Barangay Alcala, Luna, La Union.
Maibasar iti impormasyon a nakalap ti Bombo Radyo La Union manipud Luna Municipal Police Station, rinespondian da ti maysa a report manipud kadagiti maseknan nga umili nga adda nakita a maladaga iti igid ti kalsada.
Naamwan nga awan ti kawes ti maladaga a maysa a lalaki, saan pay a naputed ti puseg na (umbilical cord) ken naikabil ti bassit a kahon.
Kadwa dagiti otoridad a nagresponde dagiti barangay officials.
Dagus da nga inturong ti maladaga iti Rural Health Unit (RHU) idiay Luna para iti pannakataming.
Nai-report metten ti insidente iti Municipal Social Welfare and Development Office (MSWDO) para iti umno a pannakataripato ken pannakaaywan ti maladaga.
Agtultuloy iti panangduktal dagiti otoridad ti kinasiasino ti ina wenno siasino ti nang-abandonar ti maladaga iti igid ti kalsada.
