BR LA UNION – Natay ti dua a pulis iti napasamak a pammaltog iti uneg mismo ti Provincial Explosive and Canine Unit (PECU) idiay Bangued, Abra idi rabii ti Lunes, Nobyembre 10, 2025.
Ti presscon a naisayangkat iti PNP headquarters idiay Kampo Krame idi kalman, binigbig ni PNP Spokesperson BGen. Randulf Tuaño ti suspek nga addaan ti ranggo a Police Lieutenant ket maipagarop a pinaltugan na ti kadwa na a Police Staff Sergeant (PSSg) bayat nga agsip-sipilyo iti uneg ti barracks.
Nagsagaba ti uppat a tama ti paltog iti biktima a Police Staff Sergeant.
Kalpasan ti pammaltog, insaruno a pinaltugan ti Police Lieutenant ti maysa pay a kadwa na nga addaan ti ranggo a Police Senior Master Sergeant (PSMS) ngem saan a natamaan.
Dagus a bimmales iti Police Senior Master Sergeant ket pinaltugan ken natamaan na ni Police Lieutenant.
Ti nasao a Police Lieutenant ti agserserbi a team leader ti unit.
Agpar-parang iti inisyal nga imbestigasyon, a ti motibo ti insidente ket gaputa atapen ni Police Lieutenant a ni Police Staff Sergeant ti maysa a nagipulong iti regional office, a sumsumrek iti trabaho a nakainom wenno adda iti impluwensiya ti arak isunga pina-ayaban ti regional chief, segun kenni Tuaño .
Segun kenni Tuaño, agpada a dead on arrival iti ospital da Police Lieutenant ken Police Staff Sergeant.
Dagus met a simmuko ni Police Senior Master Sergeant a nangpaltog ken nakapatay iti suspek.
Saan pay a masinuo nu anya ti sangwen a kaso ni PSMS agsipudta impaganetget na a self-defense iti inaramid na a panangpaltog kenni Police Lieutenant.
Agtultuloy ti imbestigasyon iti nasao nga insidente.
