Sinungbatanen ni sigud nga Ako Bicol Party list Representative Zaldy Co iti nakaro a pungtot ken pammabalaw a naawat na kalpasan iti umuna a serye ti akusasion kontra iti administrasion.
Segun kenni Co, maawatan na iti sentimiento dagiti umili, ngem kiniddaw na a sakbay isuna a husgaran ket bay-an pay isuna nga agpalawag iti sibubukel a kinapudno.
Ado pay dagiti iggem na nga impormasion maipanggep iti kontrobersiya a pakairamramanan ti ₱100 billion a proyekto a nainayon iti national budget.
Mangiruar pay isuna ti kanayunan a detalye, ebidensya, ken dagiti nagan a karaman iti anomalya.
Kasaruno ti waragawag, pimmigsa iti interes ti publiko ken dagiti manmanday-linteg iti posible nga agbalin nga epekto dagiti rebelasyon kontra iti agdama nga administrasion.
Nupay kasta, agtaltalinaed a siuulimek dagiti opisial a dinakamat ni Co.
Iti agdama, awan pay ti opisial a sungbat manipud kenni President Ferdinand Marcos Jr., sigud nga Speaker Martin Romualdez, wenno ti Department of Budget and Management (DBM) maipanggep kadagiti akusasion ti sigud a kongresista. #
