Imbutaktak ni sigud nga Ako Bicol Representative Zaldy Co iti rason ti panagtalinaed na iti ruar ti pagilian, iti laskid dagiti alegasion nga aglemlemmeng isunan kalpasan a mairaman iti kontrobersiya ti flood control projects anomaly.
Iti inruar a video ti sigud a kongresista, inlawlawag ni Co a pimmanaw isuna ditoy Pilipinas idi Hulyo 19 agdama a tawen tapno agpaagas ken nakaplano nga agsubli kalpasan ti State of the Nation Address (SONA) ni Presidente Ferdinand Marcos Jr.
Nakaawat isuna ti awag manipud kenni sigud nga House Speaker Martin Romualdez ken binagaan isuna a saan nga agsubli ditoy pagilian ken alagaan isuna kas pammilin ti Presidente, isu a simmurot isuna ngem saan na a pagarupen a maaramat isuna kas “panakip-butas” para iti kampanya ti administrasion kontra korapsion.
