BR LA UNION – Impaganetget ti Iglesia Ni Cristo (INC) nga awan pakainaigan da kadagiti akusasyon ti naglosolos a mammanday linteg a ni Zaldy Co kontra kenni Presidente Ferdinand Marcos Jr.
Iti maysa nga statement, inlawlawag ni INC spokesperson Edwil Zabala, a kaatnuman ket saan da a nakasarita ni Co ken awan pakainaigan da wenno nagbalin a papel kadagiti nagbalin a waragawag ti sigud a mammanday linteg.
Inaramid ti religious group iti waragawag kagiddan ti naisayangkat a “Rally for Transparency and a Better Democracy” idiay Quirino Grandstand idi Domingo idiay Manila.
Maipalagip nga iti inruar a video statement ni Co, inakusaran na iti Presidente nga immawat ti P25 billion a kickbacks manipud iti P100 billion a naisingit iti 2025 national budget.
Ngem iti biang ti Palasyo ti Malacañang, pinaglibakan na dagiti akusasyon ni Co ken inawagan a hearsay wenno ispekulasyon laeng nga awan ti basaran ken nakarit ni Co nga agawid ditoy Pilipinas ken sapataan dagiti waragawag na.
