Kimmidaw ti imbestigasion dagiti empleyado ti Department of Health (DOH) iti Office of the Ombudsman tapno imbestigaran dagiti maipagarup a BID-Rigging ken dadduma pay a korapsion iti uneg ti ahensia.
Partikular a nadakamat iti dagos nga imbestigasion kontra kada Health Secretary Teodoro Herbosa, Head Executive Assistant Atty. Brigida Romualdez-Aquino, ken Executive Assistant VI Allan Tope gapo iti maipagarup a panangmanipula iti procurement process para kadagiti 150 nga units dagiti Mobile Primary Care Facilities nga agbalor ti ₱12 million tunggal maysa, ken panaglabsing iti Anti-Graft and Corrupt Practices Act.
Segun ti reklamo, awanan ti autoridad ken saan a paset ti Bids and Award Committee (BAC) dagiti tallo nga opisial ngem makibibbiang da iti procurement para iti supply, delivery, testing, ken commissioning dagiti Mobile Primary Care Facilities.
Maipagarup a suksuktan ni Secretary Herbosa babaen iti executive assistant na a ni Tope iti Terms of Reference (TOR).
Saan met nga end-user iti gatangen a lugan dagiti tallo nga opisial isu nga awan ti teknikal a basaran da tapno baliwan dagiti specifications a maysa a panaglabsing iti New Government Procurement Act.
Ti End-User iti addaan bileg a mangpartuat ti technical specifications ken BAC laeng iti addaan mandato nga ammirisen dagitoy.
Innayon na pay nga iti panakibiang dagiti tallo nga opisial ket pakakitaan ti “undue influence” tapno pumabor iti maysa a partikular a supplier.
Nangigubuay met ti panagbuteng ken panagamak dagiti rank-and-file employees gapo ti maipagarop a pananggipit, isu nga kiniddaw da iti Ombudsman nga ipataw iti preventive suspension kada Herbosa, Aquino, ken Tope.
Inrekomendada pay iti panangisayangkat ti forensic examination ken preservation ti procurement records karaman dagiti TOR drafts, evaluations, email exchanges, ken text messages tapno maliklikan iti posible a panagdelete ken panangmanipula kadagiti ebidensia.
Impaganetget pay dagiti complainants, tarigagay da nga agtalinaed a konpidensial iti pakabigbiganda gapo iti panagamak ti panagibales wenno mapagpudotan dagiti karaman nga opisial.
Ti laksid dagiti isyu ti kalidad, mapagduduaan a performance wenno depekto dagiti nagkauna nga equipment a nagtaud iti kapada a contractor ket maipagarup nga ipilpilit latta dagiti sumagmamano nga opisial a ditoy manen iti pagtaudan dagiti baro a unit.#
