Pinagkedkedan ti Department of Transportation (DOTr) iti taas-pasahe kadagiti pampasahero a jeep ita a tawen.
Segun kenni DOTr Secretary Giovanni Lopez, adu nga umili iti naduprak ti bagyo isu a nasken a saan pay laeng a maipatungpal iti kiddaw dagiti transport groups a panagngato ti plete.
Iti napalabas a lawas ket nangisubmitir ti rekomendasion iti Land Transportation Franchising and Regulatory Board (LTFRB) iti DOTr maipapan iti petision dagiti transport groups a mangipangato ti plete manipud P13 ket agbalin a P14 para kadagiti traditional jeepneys, ken P16 manipud P15 para kadagiti modern jeeps.
Impaganetget ti sekretario nga idi napalabas a lawas ket naaddaan ti rollback iti presio dagiti produkto a petrolyo, ken ti panagngato ti plete ket addaan ti dakkel nga epekto iti ekonomia.
Kinunana pay nga adu kadagiti kailian iti agdama nga agrekrekobre manipud iti panagduprak ti bagyo ken ginggined.
Tapno mapalag-an iti sagsagabaen dagiti tsuper ket ingetan ti DOTr iti kampaniada kontra kadagiti colorum.#
