Sinuspendir ti Office of the Ombudsman dagiti sumagmamano nga opisial ti Department of Public Works and Highways idiay Davao Occidental a karaman iti isyu ti flood control scandal.
Napaulogan ti ‘preventive suspension’ dagiti opisial a nairaman iti korapsion maitunos iti maikadua a ‘major case’ nga inpila ti Ombudsman maipapan iti flood control.
Napiliaan ti kaso a ‘Malversation of Public Funds through Falsification of Public Documents’ ken panaglabsing iti Section 3(e) ti Republic Act 3019 wenno Anti-Graft and Corrupt Practices Act dagiti walo nga opisial ti ahensia pakairamanan iti kontraktor a ni Sarah Discaya.
Segun kenni Assistant Ombudsman Mico F. Clavano, karaman iti suspension iti saan a pannakabayad wenno saan a masueldoan dagiti nadakamat a personalidad bayat nga agtultuloy wenno saan pay a naresolbar iti kaso.
Napilaan ti kaso dagiti opisial kalpasan a nakakalap ti umdas a basaran iti Ombudsman iti natakuatan a ‘Ghost Flood Control Project’ idiay Davao Occidental a napondoan ti P96.5 million.
Inlawlawag ni Assistant Ombudsman Mico Clavano nga iti panangipataw ti suspension ket maysa a ‘preventive action’ tapno saan nga apektaran dagiti respondents iti kaso, kas iti panag-tamper wenno pannakibiang kadagiti ebidensia a masarakan kadagiti opisinada.
Imbinglay pay ni Clavano nga iti sangsanguen a ‘malversation case’ dagiti respondents, inrekomendar ti prosecution iti ‘no bail’ para iti kaso.
Kayatna a sawen, no pagbigyan ti korte, saan a mapalubosan ni Sarah Disyaya a makapagpiyansa ken agtalinaed a nakaibalud bayat a madengdengngeg ti kaso.#
