Inpaganetget ni Kontra Daya Convenor Danilo Arao a kasapulan nga agbalin a napudno dagiti kandidato kadagiti amin nga insubmitir da a dokumento, aniaman a posisyon iti tarigagay da a tugawan iti gobierno.
Daytoy ket kalpasan iti panangipila ti grupo ti sumagmamano a reklamo kontra kenni Senador Rodante Marcoleta gapo iti panangideklara ti Senador a zero contributions iti Statement of Contributions and Expenditures (SOCE) iti laksid ti panangadmitir na a nakaawat isuna ti campaign donations.
Dua a nagsina a reklamo iti inpila ti nasao a grupo: umuna ket iti panaglabsing kadagiti sumagmamano a probisyon ti Election Law a nakapila iti Commission on Elections ken iti maikadua ket ti perjury complaints iti Office of the Ombudsman.
Iti pannakiuman ti Bombo Radyo Philippines kenni Arao, inpaganetget na nga obligasyon dagiti tumartaray a kandidato ken amin nga opisyal ti gobiyerno nga agbalin a silulukat, napudno, ken awan iti aniyaman nga ilemlemmeng nangruna dagiti iruruar da a public documents kas ti SOCE.
Mamati ti University of the Philippines – Diliman Professor nga iti inaramid ni Marcoleta ket umdasen a rason tapno maikkat daytoy kas elected official.
Uray awan pay iti naikkat a Senador gapo iti kapada a rason, ket adu dagiti elected officials a nadusan gapo iti simple laeng a panagbasol ken panagulbod iti SOCE.
Iti agdama ket ad-adalenen ti grupo ni Prof. Arao iti panangipila ti kapada a reklamo kontra kadagiti dadduma pay nga elected officials, karaman dagiti sumagmamano a partylist representatives a naglabsing iti election laws idi napalabas a 2025 Midterm Elections.#
