BR LA UNION – Nangiruar ti statement ti Office of the Ombudsman mainaig iti imbaga ni contractor Sarah Discaya, a nakarikna ti nakaro a buteng gapu iti posibilidad a maibalud gapu iti kaso a sangsangwenna.
Segun ken ni Assistant Ombudsman Mico Clavano, nalawag a ti panagbuteng ni Discaya ket resulta iti inaramidna partikular ti mapapati a panang-divert ti pondo para kadagiti flood control projects.
Impaganetget ti Ombudsman a minilyon a Pilipino ti nag-peligro gapu iti nasao a panagkunniber, isunga saan a mabalin nga usaren a palusot ti panagbuteng tapno maliklikan ti panagsungbat.
Maysa ni Discaya kadagiti maim-imbestigaran a kontraktor mainaig iti multi-billion peso flood control projects a mapapati a nausar iti saan nga umiso a wagas.
Adda mandato ti Ombudsman a mangipila ti kaso kontra kadagiti opisyal ken pribado nga indibidual a karaman iti graft and corruption, ken impasiguradona a marespeto ti due process para kadagiti amin nga akusado.
Iti laksid daytoy, impaganetget ni Clavano a ti pagbanagan ket resulta dagiti bukod a pangngeddeng ni Discaya, ken saan a maliklikan ti panagsungbat iti sidong ti linteg.
