Nangipila ti ‘motion for reconsideration’ iti kampo ti negosiante a ni Charlie Atong Ang iti Department of Justice (DOJ), kasaruno iti panangirekomeda ti prosekusion a kasuan isuna ken dagiti dadduma pay a respondents.
Iti immuna a waragawag ni Atty. Gabriel Villareal, kenunana a linaon ti mosion dagiti ebidensia a kayatda nga ikkan-atension ti ‘panel of prosecutors’.
Mamati iti kampo a saan a patas ken depektibo iti inruar a resolusion ti prosekusion gapu ta nakabasar daytoy kadagiti maipagarup nga ispekulasion ti whistleblower a ni alyas ‘Totoy’ wenno Julie Dondon Patidongan.
Segun kenni Justice Spokesperson Atty. Polo Martinez, saan a malappedan ti mosion iti panangipila ti ahensia ti kaso kontra kadagiti indibidual a karaman.
Manamnama a sanguen da Atong Ang ken dagiti dadduma pay a respondents dagiti kaso a ‘kidnapping with homicide’ ken ‘kidnapping with serious illegal detention’ apaman a maingato daytoy iti korte.#
