BR LA UNION – Kinumpirma ita nga aldaw ti Sabado, Disyembre 20 ni Philippine National Police Public Information Office chief Police Brigadier General Randulf Tuaño a nakatuding a mairwar ita met laeng nga aldaw ti resulta ti autopsy ti mapapati a natay a ni sigud a DPWH USec. Catalina Cabral.
Ngem inlawlawag ti PNP official nga awan ti naisayangkat a DNA test idi maipasidong iti autopsy ti bangkay ti sigud nga opisyal.
Maipalagip nga immuna a kinedkedan ti pamilya ti sigud nga DPWH official a maipasidong iti autopsy, ngem nagbaliw ti desisyon da ket immannugot da met laeng.
Ni Cabral ket maysa kadagiti kangrunaan a personalidad a mairam-raman iti nalawa a corruption scandal seknan iti flood control projects idiay Bulacan.
Nasarakan a natay ni Cabral kalpasan a maipagarop a natinnag iti derraas asideg idiay Bued River idiay Kennon Road, Tuba, Benguet idi rabii ti Huwebes, Disyembre 18.
