Binabalaw ni Atty. Harry Roque iti International Criminal Court (ICC) gapo iti maipagarup a saan pannakasurot iti pudno a basaran ti hurisdiksion daytoy kas korte.
Segun kenni Roque, ipilpilit ti international tribunal a mangusig iti pagilian a saanen a paset iti hurisdiksion ken saanen a miembro ti Rome Statute.
Dinamakat ti abogado iti kaso ni sigud a Presidente Rodrigo Duterte (FPRRD) nga iti laksid ti nabayagen a panagikkat ti Pilipinas ket nangiruar latta daytoy ti warrant of arrest.
Impaganetget ni Atty. Roque nga iti agdama a sitwasion ti ICC a makasangsango ti nadumaduma a sanctions dagiti sumagmamano a judges ken prosecutors ket rumbeng nga ipabasol iti mismo a korte.
Maipagarup pay a linipat ti ICC nga iti hurisdiksionda ket nakasalalay iti pammalubos ken panangbigbig dagiti pagilian iti mismo nga otoridad ti nasao a korte.#
