BR LA UNION – Pinili ti maysa a pamilya a gangannaet manipud Australia ti pagilian a Pilipinas a pagrambakan ti Baro a Tawen.
Nakauman ti Bombo Radyo News Team iti sumagmamano a gangannaet iti kabaybayan a sakupen ti Urbiztondo, San Juan, La Union ket imbinglay da dagiti rason no apay a ti pagilian, partikular ditoy probinsiya ti La Union iti napili da a destinasyon.
Segun kenni Chantelle Pfieffer, maysa nga Australian national ken addaan ti partner a Filipino, nasdaaw isuna iti kinapintas ti pagilian ken ti naganaygay ken narimat a selebrasyon ti Baro a Tawen.
Imbinglayna na pay a nakatuding nga agkallaysa da iti fiance na a Pilipino ditoy Pilipinas iti sumaruno a bulan.
Tarigagay ni Pfieffer ita a Baro a Tawen nga agtultuloy ti napintas a langen-langen da a pamilya, natunos, naragsak, ken narang-ay a biag.
Kinunana a pammaneknek ti kaadda da ditoy Pilipinas, nga adu a gangannaet ti mangapreciar ti pagilian kas tourist destination, ken ibilang da pay a lugar daytoy ti ayat, panagkaykaysa, ken nabaknang ti kultura ken tradisyon iti panangrambak dagiti napateg nga okasyon kas ti Baro a Tawen.
