BR LA UNION – Maximum deployment dagiti pulis ken nairut a security plan iti ipat-patungpal dagiti otoridad ti ditoy La Union partikular ti Balaoan Municipal Police Station (MPS), iti tarigagay a mabantayan a natalna ken natalged ti panagrambak dagiti umili ita a bisperas ti Baro a Tawen.
Nupay madaman ti selebrasyon dagiti tattao, adda met latta iti trabaho ken naka-alerto dagiti 38 a kameng ken puwersa ti Balaoan – Philippine National Police.
Segun kenni Police Lieutenant Ardie G. Palabay, Deputy Chief of Police for Operations ti Balaoan MPS, nakasagana a kanayon dagiti security measures, pakairamanan ti nainget a pannakaipatungpal ti Oplan Sita a mamindua a daras ti maysa a rabii, nangruna ita a panawen ti holiday season.
Kangrunaan a puntirya ti Oplan Sita dagiti motorista nga agus-usar kadagiti naariwawa nga exhaust pipe, kasta met ti Oplan Boga kontra iti pannakausar dagiti improvised firecrackers a napeggad para iti publiko.
Target ti Balaoan Police Station a pagtalinaeden ti zero casualty iti panangsarabo agingga a malpas ti selebrasyon ti baro a tawen.
Maibasar iti kauddian a datus ti La Union Police Provincial Office, umaboten ti 13 a piraso ti boga ti naisuko kadagiti pulis manipud nadumaduma nga ili ditoy probinsya kas paset ti nainget a kampanya kontra iti illegal firecrackers .
Segun iti La Union Police Provincial Office, boluntaryo nga insuko dagiti umili dagiti improvised cannons wenno boga kalpasan ti agtultuloy nga information drive ti pulisya mainaig kadagiti peggad a patauden daytoy, kangrunaan kadagiti ubbing.
