Pinasingkedan ti Manila Municipal Disaster Risk Reduction and Management Office a pimmusay iti maysa a photojournalist a ni Son H. Del Mundo, 54 anyos, kalpasan a mapukawan ti puot iti kangitingitan ti Traslacion coverage idiay Maynila.
Naiturong isuna iti pagagasan ngem idi agangay ket naideklara a pimmusay.
Kabayatanna, maibasar iti datos ti local disaster office itay alas-10 ti bigat, pakabuklan a 299 dagiti tattao a naipaayan ti medical aid kabayatan ti prosision.
Iti nasao bilang ket 13 dagiti major cases bayat a 141 dagiti naglak-am ti minor injuries.
Nakailista met ti maysa nga insidente kalpasan a ginandat ti maysa a deboto a lumasat iti barrier idiay Quezon Boulevard. Naikaglis daytoy ken immuna a bimmagsak iti rupana ken naisubsob iti semento, a nangigapuan ti injuries ken lumteg iti rupa ken dagiti limbs-na.
Nagpalagip dagiti awtoridad kadagiti nataengan a deboto ti doble-annad, agtalinaed nga hydrated, ken liklikan dagiti natao a lugar, gapu ta mabalin daytoy nga agresulta iti kinarigat nga aganges, ken pannakapukaw ti puot gapu iti panaglilinnetlet wenno panagdupodop dagiti ado a deboto.###
