Agtultuloy iti panagbantay ti Municipal Disaster Risk Reduction Office (MDRRMO) kadagiti kabaybayan idiay ili ti San Juan, La Union.
Segun kenni Gino Osvi P. Mabalot, Municipal Disaster Risk Reduction Management Officer ti nasao nga ili adda ti sistema nga ipatpatungpal ti ili maipanggep iti panagpatalged kadagiti kabaybayan a maibasar ti Municipal Ordinance No. 01-2018 (Safety and Operations).
Dagitoy dagiti nakalanad iti Ordinansa:
- Night Curfew
– Maiparit iti panagturong ken panaglangoy kadagiti kabaybayan manipud alas-sais ti rabii aginggana alas-sais ti bigat.
– Malaksid kadagiti mangngalap nga adda ti kabaelan na nga apan iti kabaybayan wenno mapan agkalap. - Arak ken Iligal a Droga
– Nainget nga iparparit iti panaginom ti arak, panagusar ken panangitugot ti iligal a droga kadagiti kabaybayan. - Dagiti Armas
– Saan a mapalubusan iti panangitugot dagiti armas kas iti paltog, kutsilyo, ken naduma-duma pay a banag a mabalin a makadangran ken makapatay. - Kindalos ken Basura
– Iparparit iti panagisbu, panagibleng, ken panangibilleng ti basura iti baybay ken iti aglawlaw ti kabaybayan. - Panangimaton kadagiti Menor de Edad
– Dagiti menor de edad ket kasapulan nga adda ti kadua da a nagannak wenno dagiti nataengan. - Permit
– Kasapulan ti permit para iti panangisuro dagiti aktibidad iti kabaybayan kas kadagiti surfing lessons, panagpataray dagiti jetski, ken naduma-duma pay. - Panawen ken Kinatalged
– Temporario a maiparit iti panagturong ken panagdigos iti kabaybayan no adda ti bagyo wenno madi ti panawen, kas panagannad ken kinatalged ti amin.
Kabayatanna, panggep daytoy nga ordinansa a siguraduen iti kinatalged, kinaurnos, kinadalos, ken nasayaat a kasasaad dagiti residente ken dagiti turista a bumisbisita iti ili.
Mamulta dagiti siasinoman nga aglabsing iti nadakamat nga ordinansa ti Php 1,000 iti umuna a panaglabsing wenno first offense, Php 2,000 iti maikadua, ken Php 5,000 wenno 30 nga aldaw a panagkulong iti maikatlo ken sumarsaruno pay a panaglabsing.
Mabalin met a makompiskar dagiti maiparit a banbanag, maipasardeng iti aktibidad, mapapanaw a dagus iti kabaybayan, ken dagiti nagannak wenno guardians iti agsungbat no menor de edad iti naglabsing.
Iti agdama a 2025 World Surf League (WSL) World Junior Championships, katinnulong ti MDRRMO San Juan, iti Philippine Coast Guard (PCG), Philippine National Police (PNP), ken Provincial Government of La Union (PGLU) nga agbanbantay iti venue tapno masigurado iti kinatalged dagiti umili, turista, ken nakipaset iti daytoy a kompetision.
Mensahe ni Mabalot iti publiko a namnamaen da a kanayun ken 24/7 iti panagbantay ti MDRRMO San Juan, ken saan nga agdudua nga umasideg kadakuada no aniaman dagiti kasapulan da a tulong.###
