Saan a bumaba ti dua a tattao iti pimmusay kalpasan iti panagduprak ti Tropical Storm Ada a nangigubuay ti napigsa a tudo, layus, ken panagreggaay ti daga idiay Bicol Region.
Idiay Matnog, Sorsogon, dua nga indibidual iti nagaboran ti daga ken tipak ti bato idi kalman. Dimmanon ti nasurok-kumurang lima nga oras iti rescue operation sakbay a mairuar iti bangkay dagiti biktima.
Idiay Baras, Catanduanes, apektado iti agos ti trapiko ken naipasara met dagiti sumagmamano a kalsada gapu iti napuskol a pitak ken debris manipud iti bantay.
Naipadamag met a zero visibility iti Caramoan, Camarines Sur gapu kadagiti napipigsa a panagtudo ken danum ti layus a simrek kadagiti pagadalan ken sementerio.
Naisayangkat iti pre-emptive evacuation idiay Viga para kadagiti residente nga adda kadagiti high-risk areas. Nairekord met dagiti panagreggaay ti daga kadagiti sumagmamano a paset ti Camarines Sur.
Idiay Daraga, Albay, napilitan nga agsara iti Salvacion, Inarado, ken Budiao spillways gapu ti ngumatngato a danum ti layus, bayat nga dagiti daan a lahar deposits ket nangigubuay ti panggat-tumeng a layos ken nalaokan ti darat ken bato idiay Guinobatan-Mayon Road.
Segun ti Albay Provincial Social Welfare and Development Office (APSIMO), nasurok a 11,000 nga tattao manipud kadagiti walo nga ili iti nagbakuit.
Agtultuloy iti monitoring dagiti lokal a gobierno kadagiti naapektaran a lugar.###
