Mangiruar ti Energy Regulatory Commission (ERC) ti show-cause order kontra iti Solar Para sa Bayan Corp. (SPBC) kasaruno dagiti naawat a reklamo manipud kadagiti consumers ken dagiti report ti maipagarup a panaglabsing, karaman iti saan nga otorisado nga operasion ken panagsingir ti kuryente nga awan ti pammalubos ti regulator.
Segun ti ERC, naipadamag a nag-operate ti SPBC idiay Paluan, Occidental Mindoro, ken dadduma pay nga off-grid areas nga awan ti kasapulan nga Authority to Operate ken Certificates of Compliance para kadagiti power generation facility daytoy.
Impaganetget ti komision nga obligado dagiti power provider a mangapala pay nga umuna dagiti nasao a pammalubos dakbay a mangrugi nga agoperate ken agsingir ti kuryente kadagiti consumer.
Ti nasao a kompania ket naipaayan ti 25-year non-exclusive franchise idi 2019 babaen ti Republic Act No. 11357 tapno mangdevelop ken agoperate ti renewable energy-based microgrids kadagiti nasulinek a lugar ken kadagiti awanan pay ti kuryente.
Nupay kasta, impaganetget ti ERC a nalawag iti prangkisa a kasapulan a sumurot iti kompania kadagiti amin nga regulatory approvals, kangrunaa iti panagaprobar dagiti singir ti kuryente.
Inladawan ni ERC Chairperson ken CEO Atty. Francis Saturnino Juan, iti maipagarop a panaglabsing kas seryoso, partikular iti panagsingir ti kuryente nga awan ti inisial a pammalubos ti komision.
Kabayatanna, iti maysa a pannakiuman, kenuna ni Batangas Representative Leandro Leviste, a maikonkonektar iti SPBC a saan nga operational iti kompania.
Innayon na pay a nagsardeng iti operasion ti SPBC nasurok uppat a tawenen iti napalabas, ken adda ti linteg a naipasa idi 2022 a maipagarup a simmukat wenno nangsapaw iti prangkisa a naipaima idi 2019.
Segun ti ERC, iti panangiruar ti show-cause order ket paset ti mandato daytoy a protektaran dagiti consumer ti kuryente ken siguraduen iti panagsurot dagiti power providers iti linteg, patakaran, ken kondision dagiti prangkisa.###
