Manglukat ti Bureau of Customs (BOC) iti gundaway para kadagiti interesado a gumatang kadagiti high-end vehicles a nakumpiskar manipud iti pamilia Disyaya babaen ti maysa a sealed bidding inton Pebrero 11, 2026.
Iti pakaammo nga inruar ti ahensia, karaman kadagiti top-tier units a maisubasta ket ti Rolls-Royce Cullinan, Bentley Bentayga, ken dadduma pay a luxury SUVs.
Karaman met iti listaan dagiti dua a unit ti Bugatti Chiron a manamnama a paginnagawan dagiti high-profile bidders.
Maangay iti nasao a public auction iti Office of the Commissioner Building idiay Port Area, Manila.
Tapno masigurado dagiti makipaset ti kalidad dagiti lugan, nangituding iti BOC ti public viewing a mangrugi manipud Pebrero 5 agingga Pebrero 6 iti BOC-Port of Manila Grounds.
Mabalin a personal a masukimat iti yunit sakbay a mangisubmitir ti bid.
Dagiti nasao a lugan ket sigud a naala dagiti otoridad kalpasan a mapaneknekan a naiserrek iti pagilian nga awan ti umno nga import documents ken saan a nagbayad ti umno a buis.
Maipalagip a nagbalin a sentro ti kontrobersia iti pamilya Discaya gapu kadagiti imbestigasion a mainaig kadagiti binilion a pesos a gatad dagiti flood control projects ken dagiti alegasion ti smuggling activities.
Impaganetget ti BOC nga amin a pondo a maurnong manipud iti auction ket direkta a maituron iti National Treasury.
Paset daytoy iti napigpigsa a kampania ti gobierno tapno mabawi dagiti maibilang nga ill-gotten wealth ken mapagnumaran ti umili.###
