Addan ti person of interest ti pulisya iti napasamak pammapatay iti 29-anyos a babae idiay Naguilian, La Union.
Segun kenni PltCol. Lawrence Ganuelas, agdama nga Information Officer iti La Union Police Provincial Office, agtultuloy ti isay-sayangkat nga imbestigasyon dagiti otoridad, tapno maamwan ti naan-anay a detalye iti nasao nga insidente.
Kinuna na a maibasar iti report ti Scene of the Crime Operative (SOCO), nakitaan ti marka a nabekkel ti biktima babaen ti inusar ti suspek nga strap ti bag ken ID lace.
Maibasar iti imbestigasyon, intact dagiti arwaten ti biktima, malaksid iti cellphone na a mapukpukaw.
Maipalagip a nasarakan ni Thelma Liza, empleyado ti maysa a mall idiay ili ti Naguilian, idi Pebrero 2 babaen ti maysa a mannalon, iti bakante a lote idiay Barangay San Isidro, Naguilian, La Union.
Pattien dagiti otoridad nga am-ammo ti biktima iti suspek ket daytoy iti nainget a duktalen da ken ti motibo iti krimen.
Mainaig kadaitoy ket nangipeksa iti nainget a panagkondenar ti lokal a gobierno ti Naguilian kasaruno ti panangallukoy kadagiti amin a motorista a dimmalyasat iti Caba-Naguilian Road, partikular sadiay San Isidro Arch, Sitio Sapilang iti isu met laeng nga aldaw ken oras nga i-review dagiti dashcams da.
Dakkel a kontribusyon ti kaso ti aniaman nga oras iti dashcam para iti pananglawlawag kadagiti maudi a kanito iti biag ni Thelma.
Adda itan iti Person of Interest dagiti otoridad ken maamwan iti pagdur-asan ti kaso kabayatan a mauur-uray ti resulta ti imbestigasyon.
Aniaman a gatad ket mapagyamanan ken dakkel a tulong para iti agladladingit a pamilya. I-scan laeng iti QR Code ti pamilya Cachero para ti naimpusuan a donasyon.
