BALAOAN, LA UNION – Nabigbigen ti bangkay a nasarakan idiay Barangay Bungol, Balaoan, La Union idi parbangon ti Martes, Pebrero 24.
Maipalagip a ti biktima ket nasarakan ti maysa a manager ti nalatak a fast-food restaurant kabayatan ti panagdalyasat na ti agpa-Amianan a paset ti national highway.
Nakasuot daitoy ti black-and-white striped jacket ken maong shorts a naka-idda kaabay ti motorsiklo na nga nakaparada ken agan-andar paylaeng.
Nakita dagiti otoridad ti tallo a basyo ti kalibre .45 a paltog iti crime scene kasta met ti maysa a heat-sealed transparent plastic sachet a naglaon ti white crystalline substance a maatap kas shabu iti bulsa ti biktima kabayatan ti inisyal nga imbestigasyon babaen iti presensya dagiti kameng ti Balaoan Municipal Disaster Risk Reduction and Management Office.
Ti biktima a ni Rheymar Soriano Ledda, 25-anyos, mannalon, ken residente ti Barangay Butubut Norte ket positibo a binigbig ti live-in partner na a ni Jessica Ogale Nones, 23-anyos, a residente metlaeng ti kapada a barangay. Naiturong ti bangkay na iti funeral home idiay ili ti Bacnotan para ti umiso a disposisyon.
Kabayatanna, boluntaryo a kumiddaw ni Ronald Ledda Senior, ama ni Rheymar, a saanen a maipasidong pay ti aniaman a post-mortem examination wenno autopsy ti bangkay ti putot na. Impasigurado met ti Balaoan Municipal Police Station a ti desisyon ti ama ket kabukbukodan na nga awan ti aniaman a klase ti panangpuersa. | via Bombo Rafael Galano
